Afmælistónleikar nemenda 1. maí kl. 16:00 í Hvolnum

 

Nú er komið að lokaviðburði 60 ára afmælisárs Tónlistarskóla Rangæinga. Þann 1. maí kl. 16:00 verður sannkölluð tónlistarveisla í Hvolnum þar sem heyra má flutta fjölbreytta tónlist  sem nemendur skólans flytja. Það er okkur sönn ánægja að bjóða þig/ykkur velkomin á þennan viðburð og fagna með okkur. Hér má hlaða niður dagksrá tónleikanna: Dagskrá afmælistónleika nemenda 1. maí 2017

 

 

Rut Ingólfsdóttir fiðluleikari og frumkvöðull í íslensku tónlistarlífi kom til okkar í heimsókn

Laugardagurinn 22. apríl var stútfullur af tónlist og gleði 🙂

Við fengum í heimsókn til okkar  Rut Ingólfsdóttur fiðluleikara, stofnanda Kammersveitar Reykjavíkur og handahafa heiðursverðlauna hinna Íslensku tónlistarverðlauna árið 2016. Rut færði skólanum að gjöf bók, “Saga Kammersveitar Reykjavíkur  1974 – 2016 – þegar draumarnir rætast” eftir hana sjálfa en hún stýrði Kammersveit Reykjavíkur í 40 ár.
Einnig færði hún  skólanum að gjöf fjöldann allan af geisladiskum bæði einleiksdiska þar sem hún spilar sjálf sem og alla geisladiska sem Kammersveitin hefur gefið út.

Tónlistarskóli Rangæinga þakkar fyrir þessar höfðinglegu gjafir. Þær munu nýtast skólanum og nemendum hans vel og eru vitnisburður um mikið og merkilegt frumkvöðlastarf Rutar Ingólfsdóttur í íslensku tónlistarlífi og tónlistarsögunni okkar.

Skólinn greip tækifærið í þessari heimsókn Rutar og óskaði eftir því að hún héldi masterclass fyrir nokkra fiðlunemendur. Hún varð við þeirri bón og kunnum við henni góðar þakkir fyrir.

 

Námskeið í jazzpíanóleik með Söru Mjöll

Í dag, laugardag, var haldið námskeið fyrir lengra komna píanónemendur í jazzpíanóleik hjá Tónlistarskóla Rangæinga. Það var Sara Mjöll Magnúsdóttir fyrrverandi nemandi við skólann sem kynnti grundvallaratriði í jazzpíanóleik fyrir nemendum á námskeiði sem samanstendur af hóptíma og einkatímum. Nemendur létu vel af námskeiðinu og Sara Mjöll var ánægð með nemendur skólans.

Námskeiðahald fyrir nemendur er fastur liður í starfi skólans en skólinn fær árlega til sín einn til tvo tónlistarmenn til að halda stutt námskeið.