Afmælisgjöf frá Kirkjukórasambandi Rangárvallarprófastsdæmis vel nýtt.

Á síðasta skólaári færði Kirkjukórasamband Rangárvallarprófastsdæmis Tónlistarskóla Rangæinga stóra peningagjöf í tilefni 60 ára afmælis skólans.  Peningagjöf sambandsins hefur verið og er nýtt til að efla hljóðfæraeign skólans. Við skólabyrjun verða teknar í notkun nýjar fiðlur sem keyptar voru í sumar og verða þær meðal annars nýttar til  fiðlukennslu leikskólabarna á Laugalandi. Peningagjöfin var einnig nýtt til að festa kaup á tveimur harmoníkum sem leigðar verða út en hingað til hefur skólinn leigt hljóðfæri frá Selfossi til að anna eftirspurn eftir hljóðfærum. Á næstu vikum  og mánuðum kaupir skólinn bæði  þverflautur og blokkflautur til að leigja út og í  forskólakennslu. Á meðfylgjandi mynd er Guðlaug Oddgeirsdóttir sem færði skólanum peningagjöfina fyrir hönd sambandsins og Chrissie Telma Guðmundsdóttir fiðlukennari með nýju fiðlurnar og harmoníkurnar tvær. Tónlistarskóli Rangæinga þakkar fyrir þessa góðu gjöf frá Kirkjukórasambandinu.