Samstarf Tónlistarskóla Rangæinga og Harmoníkufélags Rangæinga

Tónlistarskóli Rangæinga og Harmóníkufélag Rangæinga munu eiga með sér samstarf skólaárið 2017 - 2018 um að efla veg og vanda harmoníkunnar. Í samstarfinu felst sameiginlegt tónleikahald á skólaárinu 2017 - 2018 þar sem nemendur og félagar úr Harmoníkufélaginu koma fram á harmoníkutónleikum sem skólinn auglýsir bæði haustið 2017 og vorið 2018. Jafnframt styrkir Harmoníkufélagið Tónlistarskóla Rangæinga vegna kaupa á harmoníkum til að nota í kennslu við skólann. Í sumar fjárfesti skólinn í tveimur  kennsluharmoníkum og um leið gaf Harmoníkufélagið  skólanum eina afar vandaða harmoníku af gerðinni HOHNER. Tónlistarskóli Rangæinga þakkar fyrir höfðinglega gjöf og hlakkar til samstarfsins í vetur. Myndin var tekin við afhendingu HOHNER harmoníkunnar. Frá vinstri: Sigríður Aðalsteinsdóttir skólastjóri, Haraldur Konráðsson formaður Harmoníkufélags Rangæginga, Auður Friðgerður Halldórsdóttir varaformaður og Grétar Geirsson harmoníkuleikari og kennari við skólann.     Fimm nemendur munu stunda nám á harmoníku skólaárið 2017 - 2018. og munu flestir þeirra þurfa að leigja harmoníkur af skólanum.